Kwa mujibu wa Idara ya Kimataifa ya Shirika la Habari la Hawza, zaidi ya miezi minne imepita tangu kile kinachoitwa usitishaji vita katika Ukanda wa Ghaza. Katika kipindi hiki, wakazi wa Ghaza bado wanakabiliwa na matatizo kama mashambulizi makali ya utawala wa Kizayuni, ukosefu wa chakula na maji safi ya kunywa, kutopatikana kwa huduma za afya na makazi. Miili mingi ya mashahidi bado iko chini ya vifusi, na maelfu ya wagonjwa na majeruhi wanahitaji matibabu nje ya Ghaza.
Katika muktadha huo, “Muhammad Munim”, raia wa Kipalestina, ametayarisha ripoti kwa kutegemea ushuhuda wa mdomo na maandishi kuhusu hali ya watu wa Ghaza, ambayo imechapishwa kama ifuatavyo:
Mwezi wa rehema na huruma umefika, lakini watu wa Ukanda wa Ghaza wanaingia mwezi huu wakiwa katikati ya moja ya migogoro mikubwa zaidi ya kibinadamu katika historia ya kisasa. Baada ya miezi ya mapigano na kuzingirwa kwa kiwango kikubwa, miundombinu ya msingi, masoko, hospitali na nyumba zimeharibiwa kwa kiasi kikubwa, na mamilioni ya watu wamekosa makazi na wanaishi katika mahema.
Kwa mujibu wa ripoti rasmi za Umoja wa Mataifa, sehemu kubwa ya wakazi wapatao milioni 2.5 wa Ghaza bado wanakabiliwa na mgogoro mkubwa wa kupata maji safi, chakula, mafuta, umeme na dawa.
Maisha ya kwenye mahema na ukosefu wa huduma za msingi
Familia nyingi ambazo nyumba zao zimeharibiwa kwa sasa zinaishi katika mahema, shule au majengo yaliyoharibika nusu, bila joto la kutosha, maji ya kunywa ya kutosha au huduma bora za afya. Hali hii imesababisha kuongezeka kwa magonjwa yanayozuilika (magonjwa ya tumbo, maambukizi ya njia ya hewa, n.k.), hasa miongoni mwa watoto.
Hali ya afya
Vituo vingi vya afya vimeharibiwa vibaya au vinatoa huduma kwa kiwango cha chini tu. Zaidi ya wagonjwa 18,500, wakiwemo takribani watoto 4,000, bado wanasubiri matibabu nje ya Ghaza. Uhaba wa dawa, vifaa tiba na wataalamu wa afya unaendelea kuwa mkubwa.
Takwimu za malori ya misaada
Kwa mujibu wa makubaliano ya usitishaji vita, ilipangwa kuwa malori 600 ya misaada ya kibinadamu yaingie Ghaza kila siku. Hata hivyo, tangu kuanza kwa usitishaji vita, wastani wa malori 145 tu kwa siku yameingia — chini ya asilimia 30 ya mahitaji yaliyowekwa. Zaidi ya malori 6,000 yenye chakula, dawa, mahema na vifaa vya kibinadamu bado yanasubiri ruhusa ya kuingia kutoka Misri. Takribani asilimia 60 ya misaada iliyoingia ni chakula, na karibu asilimia 5 tu ni dawa na vifaa vya matibabu.
Kivuko cha Rafah
Katika wiki za karibuni, kivuko cha Rafah kimefunguliwa kwa ajili ya abiria, wagonjwa na familia pekee, lakini misaada ya kibinadamu hairuhusiwi kupita au inakabiliwa na vizuizi vikubwa. Kwa mujibu wa ripoti za UN na OCHA, hata malori yenye misaada muhimu hayajaruhusiwa kupita kwa urahisi, na bado yanategemea njia chache zenye ukaguzi mrefu.
Usalama wa chakula na Ramadhani
Hali ya usalama wa chakula Ghaza kwa sasa ni dhaifu sana na inakaribia hali ya njaa kali. Hata misaada inayoingia haitoshi kukidhi mahitaji ya kila siku ya mamilioni ya watu, hasa katika mwezi huu ambapo futari na daku vina umuhimu wa kiroho na kijamii kwa familia. Watu wengi wanalazimika kuishi kwa mgao mdogo wa chakula na misaada haba.
Katika mwezi huu mtukufu, watu wa Ghaza wana matumaini ya kuboreka kwa hali, wanaomba, wanafunga na kujaribu kushikamana na maadili ya kibinadamu na imani hata katika nyakati ngumu zaidi. Hata hivyo, ukweli ni kwamba hali ya maisha, upungufu wa misaada, uhaba wa dawa, maji safi na chakula, pamoja na kunyimwa huduma nyingi, huifanya Ramadhani hii kuwa moja ya Ramadhani ngumu zaidi katika maisha yao.
Muhammad Munim pia ametaja takwimu za watu waliovuka kutoka Ghaza tangu kufunguliwa kwa kivuko cha Rafah: watu 275 waliondoka Gaza, 213 walirudi, na 26 walirudishwa (deported).
Mbali kidogo na Gaza, hali pia ni ngumu kwa kundi jingine la Wapalestina. Wakazi wa Kipalestina wa Quds inayokaliwa, pamoja na kukabiliwa kila siku na hatari ya mashambulizi ya walowezi wenye msimamo mkali, pia wanakabiliwa na vizuizi vikubwa vya ibada katika Msikiti wa Al-Aqsa wakati wa Ramadhani.
Vizuizi vya Ramadhani vilivyotangazwa na Israel
Umri wa chini wa kuingia Msikiti wa Al-Aqsa ni miaka 50 kwa wanawake na miaka 55 kwa wanaume. Waumini wasiozidi 10,000 tu wanaruhusiwa kushiriki katika Swala za Tarawehe na Swala za Ijumaa. Wakazi wa Ukingo wa Magharibi (wasio wakazi wa Quds) wanaruhusiwa kushiriki katika Swala ya Ijumaa pekee. Watu 180 wamepewa amri ya kutokaribia Quds ya Kale na Msikiti wa Al-Aqsa.
Wanaharakati wa Kipalestina wameonya kuwa, vizuizi hivi vinakiuka uhuru wa kuabudu na ni sehemu ya sera ya makusudi ya kupunguza uwepo wa Wapalestina katika Quds inayokaliwa. Wamesema kuwa, kuendelea kwa hatua hizi na kuruhusu uvamizi wa walowezi kutasababisha kuongezeka kwa mvutano, na serikali ya utawala wa kikoloni itabeba jukumu la madhara yoyote yatakayofuata.
Gazeti la Yedioth Ahronoth pia limeripoti kuwa, taasisi za usalama na kijeshi za Israel zimeongeza kwa kiasi kikubwa hali ya tahadhari kuelekea Ramadhani. Kwa mujibu wa ripoti hiyo, jeshi la Israel litafanya mazoezi ya kijeshi kaskazini mwa Ukingo wa Magharibi katika siku zijazo, kama sehemu ya mipango yake ya kuendeleza udhibiti wa kiusalama na kuimarisha uwepo wake.
Maoni yako