Kwa mujibu wa shirika Shirika la Habari la Hawza, toleo la 21 la “Hema la Ramadhani” linafanyika kuanzia 18 Februari hadi 19 Machi sambamba na mwezi mtukufu wa Ramadhani kulingana na kalenda ya Kiislamu mjini Moscow.
Inatarajiwa kuwa wajumbe kutoka takribani nchi 10, ikiwemo Qatar, Saudi Arabia, Afghanistan, nchi za Jumuiya ya Nchi Huru (CIS) pamoja na maeneo mbalimbali ya Urusi, watahudhuria tukio hilo. Miongoni mwa wageni walioalikwa ni wawakilishi wa dini zote rasmi, maafisa wa taasisi ya urais, wajumbe wa Baraza la Shirikisho na Serikali, wageni wa ngazi ya juu kutoka nchi mbalimbali, wanazuoni, wasanii, wafanyabiashara na wanamichezo. Inakadiriwa kuwa “Hema la Ramadhani” litapokea zaidi ya watu 50,000 katika kipindi chote cha mwezi huo.
Programu ya “Mwaka wa Umoja wa Mataifa ya Urusi”
Programu ya kitamaduni na kielimu ya mwaka 2026 imewekwa wakfu kwa “Mwaka wa Umoja wa Mataifa ya Urusi” uliotangazwa na Rais wa Urusi. Waandaaji wa mradi huo walisema:
Mradi huu unalenga kuunganisha nyuzi za urithi wa kitamaduni wa mataifa ya Urusi na dunia, na kuchora taswira ya vizazi vijavyo. “Hema la Ramadhani” linawaalika wageni kutazama mustakabali kupitia dirisha la leo, kwa kutegemea tajriba yenye thamani ya zamani, na kuwasilisha maadili yaliyorithishwa kizazi hadi kizazi kwa njia ya alama na taswira za zama za sasa. Lengo ni kuunda uelewa mpya wa urithi wa kitamaduni kama msingi wa maendeleo na ustawi, na kuonyesha umuhimu wa kuunganisha sifa bora za zamani na upeo wa kesho.
Iftari za Hisani na Msaada wa Kijamii
Lengo kuu la mradi huu ni kuandaa iftari za hisani katika mwezi mzima wa Ramadhani. Mbali na ugawaji wa chakula cha jioni bila malipo ndani ya hema, zaidi ya vifurushi 1,200 vya iftari vitagawiwa kila siku nje ya eneo hilo. Pia, katika mfumo wa kampeni ya “Kulisha Wafungaji” chini ya mwamvuli wa Taasisi ya Hisani ya Zakat, zaidi ya watu 1,000 hupokea chakula cha jioni bure kila siku. Kwa mujibu wa makadirio, zaidi ya wafungaji 80,000 watanufaika na huduma ya chakula katika mwezi wa Ramadhani.
Programu ya kitamaduni hufanyika kabla ya muda wa iftari na inajumuisha maonesho ya kisanii, burudani mbalimbali, uoneshaji wa video za kielimu na hotuba za wageni maalum. Aidha, kutafanyika mashindano ya usomaji wa Qur’ani Tukufu pamoja na utambulisho wa historia na mila za mataifa na nchi mbalimbali kupitia simulizi za mashujaa wa kitaifa.
Maandalizi ya Kiufundi na Usalama
Vifaa vya kiufundi vya hema vimeboreshwa ili kuhakikisha joto linalofaa, na endapo itahitajika, vifaa vya ziada vya kupasha joto vitawekwa. Kwa ajili ya usalama, uzio na vifaa vya kugundua metali vitawekwa katika eneo hilo.
Mradi huu utahitimishwa kwa tamasha la jadi la mji la “Eid al-Fitr” tarehe 21 na 22 Machi.
Waandaaji wa mpango huu wa kitamaduni ni Utawala wa Kidini wa Waislamu wa mji wa Moscow kwa msaada wa Utawala wa Kidini wa Waislamu wa Shirikisho la Urusi na Manispaa ya Moscow. Zaidi ya waliojitolea 500 wanashiriki katika utekelezaji wake. Usimamizi wa mradi huu uko chini ya Naibu Mwenyekiti wa Utawala wa Kidini wa Waislamu wa Shirikisho la Urusi na Mufti wa Moscow, Ildar Alyautdinov.
Ofisi ya Habari ya Utawala wa Kidini ya Waislamu wa Moscow
Maoni yako