Amali za Usiku wa Kumi na Tatu wa Mwezi wa Rajabu

Kwa mujibu wa taarifa ya Shirika la Habari la Hawza, kwa munasaba wa usiku na mchana wa tarehe kumi na tatu wa mwezi wa Rajabu, amali za usiku na mchana huu muhimu wa mwezi wa Mwenyezi Mungu zinawasilishwa kwenu kama ifuatavyo:

Kufunga ndani ya Mwezi wa Rajabu

Miongoni mwa amali zilizosisitizwa sana katika mwezi wa Rajabu ni kufunga. Kama alivyosema Mtume wa Mwenyezi Mungu (s.a.w.w):
“Yeyote atakayefunga siku moja katika mwezi huu, atapata radhi kubwa ya Mwenyezi Mungu, ghadhabu ya Mwenyezi Mungu itaondoka juu yake na milango ya Jahannam itafungwa kwake.”

Na pia katika riwaya imeelezwa kuwa yeyote atakayefunga siku tatu za mwezi huu, ambazo ni Alhamisi, Ijumaa na Jumamosi, atapata fadhila kubwa; na hali hii ipo pia katika miezi mingine mitukufu.

Siku ya Kumi na Tatu Rajabu ni Siku Gani?

Siku ya kumi na tatu ya mwezi wa Rajabu ni miongoni mwa siku kubwa zaidi za mwaka, kwa sababu Imamu wa kwanza wa Mashia, Imamu Ali (a.s), alizaliwa siku ya Ijumaa, tarehe 13 Rajabu mwaka wa thelathini baada ya mwaka wa Ndovu, ndani ya Nyumba ya Mwenyezi Mungu (Kaaba).

Baba yake ni Abu Talib, mwana wa Abdul-Muttalib bin Hashim bin Abd Manaf (ami yake Mtume (s.a.w.w)), na mama yake ni Fatima binti Asad bin Hashim. Hivyo basi, Imamu Ali (a.s) anatokana na ukoo wa Hashim kutoka pande zote mbili.

Amali za Usiku wa Kumi na Tatu

Ni mustahabu katika kila moja ya miezi ya Rajabu, Shaaban na Ramadhani, kuswali rakaa mbili katika usiku wa kumi na tatu.

Swala ya Usiku wa Kumi na Tatu Rajabu

Imesuniwa kuswali rakaa mbili katika usiku wa kumi na tatu wa Rajabu, ambapo katika kila rakaa husomwa:

Suratul-Fātiha mara moja, Surah Yāsīn, Surah Tabārakal-Mulk, na Surah Tawḥīd. Na katika usiku wa kumi na nne huswaliwa rakaa nne (yaani swala mbili za rakaa mbili), kwa namna ile ile; na katika usiku wa kumi na tano huswaliwa rakaa sita kwa salamu tatu, kwa namna ile ile.

Imepokewa kutoka kwa Imamu Ja‘far al-Sadiq (a.s) kwamba:

“Yeyote atakayetekeleza amali hizi, atapata fadhila zote za miezi hii mitatu na atasamehewa madhambi yake yote isipokuwa shirki.”

Imamu Ja‘far al-Sadiq (a.s) amesema:

“Mwenyezi Mungu ameupa umma huu miezi mitatu yenye thamani kubwa ambayo hakuwapa mataifa yaliyotangulia, nayo ni miezi ya Rajabu, Shaaban na Ramadhani. Na pia amewapa usiku mitatu ambayo hakuwapa waliotangulia, nayo ni usiku wa kumi na tatu, kumi na nne na kumi na tano wa mwezi. Na pia amewapa sura tatu (zilizojaa fadhila na maana kubwa) ambazo hakuwapa umma uliopita, nazo ni Surah Yāsīn, Surah al-Mulk na Surah al-Tawḥīd. Basi yeyote atakayekusanya fadhila hizi tatu, atakuwa amekusanya bora zaidi ya neema walizopewa umma huu.”

Pia katika baadhi ya riwaya imeelezwa kuwa Mtume wa Mwenyezi Mungu (s.a.w.w) amesema: “Yeyote atakayeswali rakaa kumi katika usiku wa kumi na tatu wa mwezi wa Rajabu kwa namna hii: katika rakaa ya kwanza asome Suratul-Fātiha na Suratul-‘Ādiyāt mara moja, na katika rakaa ya pili asome Suratul-Fātiha na Suratul-Takāthur mara moja, na rakaa nyingine aziswali kwa namna hiyo hiyo, Mwenyezi Mungu atamsamehe madhambi yake.”

Amali za Siku ya Kumi na Tatu

Tarehe kumi na tatu Rajabu ni siku ya kwanza ya masiku meupe, na kuna thawabu nyingi sana kwa kufunga siku hii pamoja na siku mbili zinazofuata. Na ikiwa mtu ana nia ya kutekeleza amali za Ummu Dawud, basi ni lazima afunge siku hii.

Na katika siku hii, kwa mujibu wa kauli mashuhuri, baada ya kupita miaka thelathini tangu mwaka wa Ndovu, kuzaliwa kwa baraka kwa Amirul-Mu’minin Ali (a.s) kulitokea ndani ya Kaaba tukufu.

Chanzo: Mafatih al-Jinan