Kwa mujibu wa Idara ya Kimataifa ya Shirika la Habari la Hawza, Jumuiya ya Wanawake ya Halqa ya Kano na maeneo ya jirani, iliyo chini ya Harakati ya Kiislamu ya Nigeria inayoongozwa na Sheikh Ibrahim Zakzaky, iliandaa sherehe za kuadhimisha kuzaliwa Bibi Zainab al-Kubra (s.a.) katika Kituo cha Kidini cha Kofar Waika, kilichopo katika mji wa Kano.
Mwanzoni mwa hafla hiyo, dua ilisomwa pamoja na Qur'ani Tukufu. Baadaye, Bi Amina Talha alitoa hotuba iliyofafanua vipengele mbalimbali vya maisha ya Bibi Zainab (s.a.), nafasi yake katika familia ya Mtume Muhammad (s.a.w.w.), pamoja na sifa zake mashuhuri za kimaadili na kiroho.
Akizungumzia majina ya heshima aliyopewa Bibi Zainab (s.a.), kama vile Aqilat Bani Hashim, Shujaa wa Karbala na Ummul-Masaib (Mama wa Misiba), Bi Amina alisema kuwa majina hayo yanaonesha nafasi yake ya kielimu, hekima, ushujaa na subira. Pia alieleza misiba aliyokumbana nayo Bibi Zainab (s.a.) kufuatia kuuawa kishahidi baba yake mtukufu, Imam Ali (a.s.), kaka yake Imam Hassan al-Mujtaba (a.s.), pamoja na tukio la kusikitisha la Karbala.
Mzungumzaji huyo pia alifafanua kipindi cha kukua na kulelewa Bibi Zainab (s.a.) katika familia ya Ahlul-Bayt (a.s.), akisisitiza kuwa malezi aliyoyapata katika mazingira hayo yalichangia kujengwa shakhsia yake mashuhuri katika elimu, maadili na ustahimilivu. Alikuwa na shakhsia iliyosimama imara katika imani na misingi ya kidini hata katika mazingira magumu zaidi.
Katika kuendelea na hotuba yake, Bi Amina alizungumzia ndoa ya Bibi Zainab (s.a.) na Abdullah bin Ja'far, pamoja na jinsi Bibi huyo alivyokuwa akizingatia hijabu, kusimamisha swala na kufanya ibada za usiku. Alieleza kuwa mambo hayo ni miongoni mwa vielelezo vya kushikamana kwake na mafundisho ya Uislamu.
Aidha, akizungumzia tukio la Ashura la mwaka 61 Hijria, ambapo Imam Hussein (a.s.) na wafuasi wake waliuawa kishahidi, alisisitiza nafasi ya kihistoria ya Bibi Zainab (s.a.) katika kuvumilia misiba ya Karbala na kulinda ujumbe wa mapambano ya Imam Hussein (a.s.).
Kusisitiza Kubadilisha Mafundisho ya Ahlul-Bayt (a.s.) Kuwa Sehemu ya Matendo ya Kila Siku
Katika sehemu iliyofuata ya hafla hiyo, Bi Maymuna Abdullahi, mke wa marehemu Sheikh Muhammad Turi, ambaye alikuwa mgeni maalumu wa programu hiyo, alisisitiza umuhimu wa kutekeleza kwa vitendo mafundisho ya Ahlul-Bayt (a.s.). Aliwataka wanawake kutumia majlisi za kidini na maadhimisho ya matukio ya kidini kama fursa ya kurekebisha mwenendo wao na kuimarisha maadili mema.
Alibainisha kuwa: Kuadhimisha na kuwakumbuka Ahlul-Bayt (a.s.) hakupaswi kuishia tu katika kusikiliza historia ya maisha yao wakati wa hafla za kidini, bali matokeo ya kuwafahamu yanapaswa kuonekana katika tabia, mavazi, maadili na mtindo wa maisha wa watu.
Mzungumzaji huyo pia alisisitiza umuhimu wa kutafuta elimu na kuyatumia maarifa yaliyopatikana. Aliwataka wanawake kujitahidi kuwa mifano bora katika nyanja za elimu, ukomavu wa fikra, maadili mema na mwenendo wa kijamii.
Aliongeza kuwa wanachama wa Harakati ya Kiislamu wanapaswa kujiendesha kwa namna ambayo watu wengine wanapokutana nao, waone mfano wa maadili ya Kiislamu na malezi sahihi. Alieleza kuwa jambo hilo linaweza kusaidia kuitambulisha kwa namna bora zaidi Madhehebu ya Ahlul-Bayt (a.s.) pamoja na Harakati ya Kiislamu ya Nigeria.
Baada ya hotuba ya mgeni maalumu, kundi la waimbaji wa kaswida na wasomaji wa mashairi ya kidini wanaohusishwa na Harakati ya Kiislamu ya Nigeria liliwasilisha mashairi na tenzi za kidini, na hivyo kuongeza hamasa ya kiroho katika hafla hiyo.
Miongoni mwa shughuli nyingine zilizofanyika katika programu hiyo ni kukata keki ya kuadhimisha kumbukumbu ya kuzaliwa Bibi Zainab (s.a.), kuigawa kwa waliohudhuria pamoja na kuwapatia washiriki mapokezi na vyakula.
Maoni yako