Kwa mujibu wa Shirika la Habari la Hawza, makamanda wakuu wa Majeshi ya Ulinzi wamekutana na Mtukufu Ayatullah Sayyid Mujtaba Khamenei, Kiongozi Mkuu wa Mapinduzi ya Kiislamu na Amiri Jeshi Mkuu.
Kiongozi Mkuu wa Mapinduzi, katika kikao hicho, ameashiria "hali ya kuwa tayari kijeshi kwa namna ya kiakili na kimkakati ili kukabiliana kwa nguvu na maadui" kuwa miongoni mwa mahitaji ya msingi ya "kuzuia uchokozi kwa kiwango cha juu kabisa". Aidha, ametoa maelekezo kwamba "kila kiwango na aina ya tishio vinapaswa kukabiliwa kwa jibu la haraka, lenye athari na lisilokuwa na mipaka ya kijiografia."
Ayatullah Sayyid Mujtaba Khamenei amesisitiza kuwa; iwapo maadui wataanzisha tena mashambulizi ya kijeshi au ya kigaidi, basi ni Majeshi ya Ulinzi ya Jamhuri ya Kiislamu na taifa la Iran ndizo zitakazoamua wakati na mazingira ya kumalizika mashambulizi hayo.
Amiri Jeshi Mkuu pia amesisitiza umuhimu wa kuimarisha mfumo wa kijasusi wa kijeshi; kuimarisha zaidi uwezo wa ulinzi wa ndani katika nyanja mbili za "dhamira na falsafa ya kijeshi" na "mbinu za kivita"; kuendeleza uwezo wa kisasa wa ulinzi na usalama kwa kutumia teknolojia mpya; pamoja na kuimarisha uwezo wa kiroho na ari ya jihadi. Hatua hizo zinapaswa kwenda sambamba na juhudi zisizokoma za kuhakikisha upatikanaji wa mahitaji ya kimaisha na kutoa msaada kwa Majeshi ya Ulinzi.
Katika sehemu nyingine ya maelekezo ya Amiri Jeshi Mkuu, imeamuliwa kuwa orodha ya malengo ya kijeshi isasishwe kwa namna ambayo itahakikisha aina zote za mali na rasilimali za adui wa Marekani na Uzayuni, ziwe za kimwili au zisizo za kimwili, zinaingia katika wigo wa shabaha zinazoweza kufikiwa na Majeshi ya Ulinzi.
Amiri Jeshi Mkuu ameitaja himaya ya kitaifa kwa Majeshi ya Ulinzi kuwa mojawapo ya nguzo za kuzuia uchokozi wa wageni wanaoipinga Iran na mamluki wao wa ndani. Ameongeza kuwa: "Uwepo wa miezi nane wa taifa lililoinuka katika medani mbalimbali ni mwendelezo wa Ulinzi Mtakatifu wa miaka minane. Ulinzi huo, sambamba na msimamo thabiti wa Kijeshi, Polisi na vikosi vya Basiji, umeilinda na utaendelea kuilinda mipaka ya ardhi ya Iran na Mfumo wa Kiislamu."
Kiongozi Mkuu wa Mapinduzi ya Kiislamu, akitoa shukrani kwa msimamo imara na wenye busara wa Jamhuri ya Muqawama katika nchi mbalimbali, ameutaja umoja wa nyanja mbalimbali kuwa kigezo chenye nafasi ya kuamua na athari za kimkakati katika kuunda mfumo mpya wa kisiasa na kiusalama katika eneo la Asia Magharibi. Aidha, ameelezea matumaini yake kwamba mfumo huo mpya utakuwa mazingira yatakayochochea kwa kiwango kikubwa zaidi umoja wa mataifa na serikali za Kiislamu, kwa lengo la kuasisi ustaarabu mpya wa Kiislamu.
Meja Jenerali Abdullahian, Mkuu wa Makao Makuu ya Jumla ya Majeshi ya Ulinzi; Meja Jenerali Hatami, Amiri Jeshi Mkuu wa Jeshi la Iran; na Meja Jenerali Vahidi Amiri, Mkuu wa Jeshi la Walinzi wa Mapinduzi ya Kiislamu (IRGC), katika kikao chao na Amiri Jeshi Mkuu, waliwasilisha taarifa kuhusu hali ya utayari wa kiulinzi wa vikosi vinavyoilinda nchi katika maeneo ya pwani ya Ghuba ya Uajemi, maeneo ya operesheni ya Mlango-Bahari wa Hormuz, Bahari ya Oman, pamoja na mipaka ya kaskazini-magharibi na kusini-mashariki mwa nchi.
Vilevile, waliwasilisha taarifa kuhusu ongezeko la uzalishaji kwa mara kadhaa wa aina mbalimbali za zana za kivita na silaha za upelelezi, usaidizi na mapambano ya kijeshi.
Amiri Jeshi Mkuu, akielezea kuridhishwa kwake na shughuli zilizotekelezwa, aliwaomba makamanda wakuu wa kijeshi kufikisha shukrani na ridhaa yake kwa wanajeshi wote, vikosi vya polisi, wanachama wa Basiji, wafanyakazi wa taasisi hizo na Wizara ya Ulinzi, pamoja na familia zao tukufu.
Maoni yako