Kwa mujibu wa Shirika la Habari la Hawza, ujumbe wa walimu na wanazuoni wa Hawza Tukufu ya Jamhuri ya Kiislamu ya Iran ulihudhuria hafla ya kumbukumbu ya mashahidi wa muqawama, hususan ya Sayyid Hassan Nasrallah, kiongozi mkuu wa mashahidi wa mstari wa mbele wa muqawama nchini Lebanon.

Katika mahojiano na mwandishi wa Hawza, Hujjatul-Islam wal-Muslimin Sayyid Mufid Husayni Kuhsari, Naibu wa Kimataifa wa hawza, alifafanua kuhusu umuhimu na maelezo ya safari hiyo.

Umuhimu na namna ya safari ya ujumbe wa Hawza kwenda Lebanon

Hujjatul-Islam Kuhsari alisema: “Siku chache kabla ya kumbukumbu ya mwaka wa kwanza wa kuuawa shahidi Sayyid Hassan Nasrallah na Sayyid Hashim Safiuddin, sambamba na kumbukumbu ya Sayyid Abbas Musawi (Katibu Mkuu wa zamani wa Hizbullah), hafla kubwa zilifanyika katika maeneo mbalimbali ya Lebanon.”

Aliongeza kuwa: “Sifa ya kipekee ya mwaka huu ilikuwa ni upeo wa mpangilio na ukubwa wa shughuli hizo. Ndani ya muda wa takriban wiki mbili, hafla na programu nyingi ziliandaliwa katika miji kadhaa, na hawza ya Iran ilialikwa kushiriki. Ujumbe huo wa Hawza uliwakilisha heshima kwa mashahidi wa muqawama, wakiwemo Sayyid Hassan Nasrallah na Sayyid Hashim Safiuddin, pamoja na kuonesha mshikamano na wananchi wa Lebanon, hasa Hizbullah.”

Naibu huyo wa kimataifa aliongeza: “Sherehe hizo zilihudhuriwa pia na ujumbe kutoka nchi mbalimbali. Umuhimu wa nafasi ya kipekee ya Sayyid Hassan Nasrallah – ambaye mbali na uongozi wake wa kijeshi na kisiasa alikuwa ni mwanazuoni wa daraja la juu katika ulimwengu wa Kiislamu, mwenye michango katika masuala ya itikadi, tafsiri na kalam – ulifanya hawza ya Iran ione ni wajibu kushiriki. Ujumbe ulijumuisha wanazuoni wenye tajriba katika masuala ya elimu, ulinganizi, vyombo vya habari, uhusiano wa kimataifa na mikakati ya kielimu.”

Hujjatul-Islam Kuhsari aliongeza kuwa: “Lebanon kihistoria ni ngome muhimu ya elimu ya Kishia, hasa katika eneo la Jabal ‘Āmil, jambo linaloongeza umuhimu wa uhusiano wa kielimu kati ya hawza ya Iran na Lebanon. Hivyo tulichagua kundi maalumu la wanazuoni mashuhuri kushiriki, japokuwa kwa sababu za kiusalama, idadi ya wajumbe haikuweza kuwa kubwa zaidi.”

Shughuli za ujumbe wa Hawza nchini Lebanon

Alisema: “Katika siku chache za safari hiyo, tulifanikiwa kuendesha zaidi ya programu 40 za kielimu, kitamaduni na vyombo vya habari. Wakati mwingine, programu kadhaa ziliendelea kwa wakati mmoja katika miji tofauti. Mbali na kushiriki kwenye hafla za kumbukumbu ya mashahidi, tulifanya mikutano na wakuu wa hawza ya Lebanon, wanazuoni wa Kisunni, familia za mashahidi wa Hizbullah, pamoja na wanafunzi na wanazuoni wa Kiirani wanaosoma Lebanon. Pia tulifanya ziara katika taasisi za kielimu na vyuo vikuu, na mahojiano kadhaa na vyombo vya habari vya Lebanon.”

Aliongeza: “Kwa kuzingatia uzoefu wa wajumbe wetu, tulijadili kwa kina namna ya kuimarisha uhusiano kati ya Hawza za Kishia na Kisunni, na mikakati ya kuimarisha Jabhatul-Muqāwamah. Tuna matumaini kuwa safari hii itakuwa mwanzo wa sura mpya ya mahusiano ya kielimu na kitamaduni kati ya Hawza za Iran na Lebanon.”

Taarifa za moja kwa moja kuhusu hali ya Hizbullah

Alipoulizwa kuhusu hali ya sasa ya Hizbullah, Hujjatul-Islam Kuhsari alisema: “Kile tulichokiona Lebanon ni Hizbullah yenye nguvu, mshikamano na muundo wa kiutawala uliokomaa. Wengi walidhani kuwa baada ya kuuawa shahidi Sayyid Hassan Nasrallah na baadhi ya makamanda wa muqawama, Hizbullah ingedhoofika, lakini tuliona kinyume chake.”

Aliendelea kusema: “Ndani ya Lebanon tuliona nidhamu, uthabiti na uongozi makini miongoni mwa wapiganaji wa Hizbullah. Msingi wao wa kijamii ni mpana na unaoonekana wazi katika jamii ya Lebanon. Licha ya mashinikizo ya kisiasa, kijeshi, na juhudi za kuwaondolea silaha, Hizbullah imeendelea kuwa thabiti na imara.”

Kuhsari aliongeza: “Kwa nguvu zote za kisiasa na kijeshi anazomiliki adui – ukiwemo utawala wa Kizayuni na washirika wake wa kimataifa – bado hawajaweza kuishinda Hizbullah. Hii ni kwa sababu ya imani yao, busara yao, na uimara wa taasisi yao. Hizbullah leo inasonga mbele kwa nguvu na inaendelea kupata upendo wa wananchi zaidi ya hapo awali.”

Akasema pia: “Uaminifu wa Hizbullah kwa dhamira yake ya kimungu na misingi ya kiimani ndio kizuizi kikubwa dhidi ya udhaifu. Licha ya changamoto nyingi, wameendelea kusimama kwa nguvu katika njia ya haki.”

Nafasi ya kizazi kipya na mustakbali wa Hizbullah

Hujjatul-Islam Kuhsari alisema: “Ukweli kwamba Hizbullah imeweza kuandaa na kutekeleza programu nyingi na kubwa katika miji mbalimbali licha ya vikwazo na shinikizo, ni ushahidi wa uwezo wa kizazi kipya cha viongozi vijana. Nidhamu, utulivu na hekima vilivyoonekana katika shughuli zao ni alama ya uongozi bora na ari thabiti ya wanamuqawama hawa.”

Mwelekeo mpya wa ushirikiano wa kielimu kati ya Iran na Lebanon

Alimalizia kwa kusema: “Iran na Lebanon ni mataifa yenye uhusiano wa kale, wa kiutamaduni na kidini. Safari hii imelenga kuimarisha msingi wa mawasiliano kati ya vyuo vya dini vya nchi hizi mbili, na kupeleka mbele uhusiano baina ya Hawza kwa upeo mpya. Pia tulijenga madaraja ya mawasiliano na vyuo vya Kisunni nchini Lebanon na kupata uzoefu muhimu.”

Naibu wa kimataifa wa vyuo vya dini alisisitiza kuwa: “Kipaumbele cha leo cha Hawza ni kufafanua fikra na falsafa ya muqawama katika ulimwengu wa Kiislamu, fikra ambayo lazima ipenye kwenye tabaka zote za Waislamu. Kuendeleza ‘Jihād at-Tabyīn’ na kuimarisha wigo wa muqawama ni miongoni mwa majukumu makuu ya Hawza za Kishia na Kisunni katika zama hizi.”