Jumatano 18 Novemba 2026 - 19:00
Ayatullah Wahid Khorasani Alikuwa Miongoni mwa Maraji' Waliounga Mkono Wilaya na Aliyehuisha Alama za Kidini za Fatimiyyah

Hawza/ Mjumbe wa Baraza Kuu la Hawza za Kielimu nchini Iran amesema kuwa, sambamba na kumuenzi na kutukuza nafasi ya kielimu na kiroho ya marehemu mtukufu, Ayatullah Al-Udhma Wahid Khorasani, anamtambua kuwa mmoja wa walimu mashuhuri wa Hawza ya Kielimu na miongoni mwa Maraji' waliounga mkono Wilaya.

Kwa mujibu wa Shirika la Habari la Hawza, Ayatullah Mahmoud Rajabi, Mkuu wa Taasisi ya Elimu na Utafiti ya Imam Khomeini (r.a.), akizungumza na mwandishi wa Shirika la Habari la Hawza pembezoni mwa hafla ya mazishi ya mwili mtukufu wa Ayatullah Al-Udhma Wahid Khorasani, alieleza vipengele mbalimbali vya haiba yake, kielimu na kiroho, na kusisitiza nafasi yake muhimu katika kutetea tunu za kidini.

Mjumbe wa Kamati ya Uongozi ya Baraza la Wanazuoni Wataalamu wa Uongozi (Majlis Khubregan-e Rahbari), akizungumzia nafasi ya kielimu na ya Hawza ya mwanachuoni huyo wa Fiqhi aliyekuwa na mafungamano na Ahlul-Bayt (a.s.), alisisitiza: "Ayatullah Wahid Khorasani alikuwa miongoni mwa walimu mashuhuri wa Hawza ya Kielimu ya Qum na miongoni mwa Maraji' wa kuigwa ambao siku zote, kwa busara na ikhlasi, walikuwa wakiunga mkono na kuitetea nafasi ya Wilayat Faqihi pamoja na tunu za Kiislamu."

Akiendelea kusisitiza namna marehemu huyo mtukufu alivyokuwa akijali kwa namna ya pekee kueneza mafundisho ya Ahlul-Bayt (a.s.), aliongeza: "Alikuwa na mapenzi na heshima ya pekee kwa familia ya Ahlul-Bayt, na alionesha juhudi za dhati kuhakikisha kwamba kumbukumbu na majina ya Ahlul-Bayt (a.s.), pamoja na dhuluma walizofanyiwa, vinaendelea kuwa hai na kufafanuliwa kwa jamii."

Ayatullah Rajabi, akizungumzia namna ya pekee ambayo Ayatullah Wahid Khorasani alivyokuwa akionesha heshima na mapenzi kwa hadhi takatifu ya Aba Abdillah Hussein Imam Hussein (a.s.), alibainisha: "Pia alikuwa akionesha juhudi za pekee katika kufufua na kuhuisha alama na nembo za kidini za Fatimiyyah, pamoja na kufafanua vipengele mbalimbali vya maisha ya Swiddiqah Tahirah, Bibi Fatimah Zahraa (s.a.)."

Mkuu wa Taasisi ya Imam Khomeini (r.a.), mwishoni mwa mahojiano yake, alimtaja Bibi Fatimah Zahraa (s.a.), kwa mujibu wa mtazamo wa Maraji' huyo mkuu wa kidini, kuwa ni mfano na kielelezo kamili cha mwanamke mpambanaji, mwenye kushikamana na Wilaya na anayejitahidi katika njia ya Mwenyezi Mungu. Alisema kuwa Bibi Zahraa (s.a.) aliweza kuonesha ndani ya mfumo wa familia yake njia bora na ya juu kabisa ya kuhusiana na mumewe na watoto wake, na hivyo kuwa kielelezo kilichoweza kuiongoza jamii ya Kiislamu.

Lebo

Maoni yako

You are replying to: .
captcha