Kwa mujibu wa Shirika la Habari la Hawza, majlisi hiyo ilifanyika jana kupitia Hawza ya Khatamul Anbiyaa, ambapo ilihudhuriwa na Mudiri wa Hawza hiyo, Sheikh Bashiri, pamoja na washiriki wengine waliokusanyika kwa lengo la kukumbuka maisha, mwenendo na historia ya kusikitisha ya Bibi Fatimah Zahraa (as).
Maadhimisho hayo yamekuwa sehemu muhimu ya kuenzi na kukumbuka msiba mkubwa wa kufariki kishahidi Bibi Fatimah Zahraa (as), ambaye alikuwa miongoni mwa wanawake watukufu na wenye nafasi ya kipekee katika historia ya Uislamu.
Kumbukumbu ya shahada ya Bibi Fatimah Zahraa (as) ni tukio linalogusa nyoyo za waumini, hususan wafuasi wa Madhehebu ya Shia, ambao kila mwaka katika maeneo mbalimbali duniani huandaa majlisi za maombolezo kwa ajili ya kumuenzi binti huyo wa Mtume wa Mwenyezi Mungu (saww).
Kwa waumini, kuadhimisha kumbukumbu hii si jambo la kukumbuka historia pekee, bali pia ni fursa ya kutafakari maisha ya mwanamke huyo mtukufu, aliyekuwa mfano wa imani, subira, ibada, kujitolea na kusimama imara katika kulinda mafundisho ya Uislamu.
Hakika, kupita miaka hakujafuta huzuni ya msiba huu katika nyoyo za wapenzi wa Ahlul-Bayt (as). Badala yake, kumbukumbu ya Bibi Fatimah Zahraa (as) inaendelea kuwa hai, ikiwakumbusha waumini umuhimu wa kushikamana na mafundisho ya Mtume Muhammad (saww) na kizazi chake kitukufu.
Maoni yako