Kwa mujibu wa sShirika la Habari la Hawza, tukio hilo lililofanyika jana tareh 28 Swafar 1448, liligeuka kuwa mkusanyiko mkubwa wa waumini waliounganishwa na mapenzi juu ya Mtume wa Mwenyezi Mungu (saww). Washiriki walitembea kwa utulivu huku wakibeba katika nyoyo zao kumbukumbu ya msiba mkubwa ulioupata Umma wa Kiislamu baada ya kufariki kwa Mtume (saww), ambaye maisha yake yalikuwa yamejaa juhudi za kuufikisha ujumbe wa Mwenyezi Mungu na kuwaongoza watu katika njia ya haki.
Matembezi hayo yaliongozwa na Sheikh Abdulmaajid Naasir, ambaye aliungana na waumini katika kuhuisha kumbukumbu hiyo yenye uzito mkubwa. Uwepo wa viongozi na wanazuoni wa dini uliongeza umuhimu wa tukio hilo, huku wakishirikiana na waumini kuonesha mapenzi na heshima yao kwa Mtume Muhammad (saww).
Miongoni mwa masheikh walioshiriki katika matembezi hayo ni Sheikh Ali Yusuf na Sheikh Mussa Ratidu, pamoja na masheikh wengine mbalimbali. Ushiriki wao ulitoa taswira ya umoja wa viongozi wa dini na waumini katika kuhifadhi kumbukumbu za matukio muhimu ya historia ya Uislamu na kuendeleza mafundisho ya Mtume (saww) kwa vizazi vijavyo.
Kwa waumini wa Zanzibar, kumbukizi ya kifo cha Mtume (saww) ilikuwa wakati wa kusimama na kutafakari kwa kina juu ya maisha ya Mtume, mateso na changamoto alizokabiliana nazo katika kuufikisha ujumbe wa Mwenyezi Mungu, pamoja na nafasi yake katika kujenga jamii iliyosimama juu ya misingi ya imani, uadilifu, huruma na mshikamano.
Katika mazingira hayo ya majonzi, matembezi hayo yalikuwa zaidi ya mkusanyiko wa watu; yalikuwa ni ujumbe wa mapenzi kwa Mtume (saww) na ahadi ya kuendelea kuenzi mafundisho yake. Nyuso za waumini zilionesha hisia za huzuni, huku mioyo yao ikiwa imejaa kumbukumbu ya kiongozi ambaye kifo chake kiliacha pengo kubwa lisiloweza kufutika katika historia ya Umma wa Kiislamu.
Maoni yako