Kwa mujibu wa Shirika la Habari la Hawza, mfululizo wa tafiti za Mahdawiyya chini ya kichwa cha habari kisemacho “Kuielekea Jamii Bora”, kwa lengo la kusambaza mafundisho na maarifa yanayohusiana na Imam wa Zama (a.j.t.f.sh.), unawasilishwa kwenu nyinyi wasomi waheshimiwa.
Imani juu ya kuja kwa Mwokozi ni miongoni mwa masuala yanayokubaliwa na kushirikishwa na dini za Kiyahudi-Kikristo (dini za Ibrahimu) na hata zisizo za Ibrahimu. Migogoro na matatizo mazito yaliyohatarisha uwepo wa binadamu, na ambayo wanadamu kwa uwezo wao wenyewe hawakuweza kuyakabili, ndiyo sababu kuu iliyopelekea kuundwa kwa fikra ya Mwokozi katika dini mbalimbali. Kuambatana kwa kudhihiri kwa Mwokozi na sifa kama kuenea kwa uadilifu, kupambana na dhulma na mengineyo, kumepelekea watu wa kila dini na itikadi daima kutamani kuja kwa Mwokozi wao. Ni dhahiri kwamba kiwango cha hamu na shauku ya kudhihiri kwa Mwokozi hutokana na sababu mbalimbali. Miongoni mwa sababu hizo, vyombo vya habari ni miongoni mwa vipengele vyenye athari kubwa zaidi katika kuunda shauku na hamasa hiyo. Vyombo vya habari ni miongoni mwa nyenzo zenye ushawishi mkubwa zaidi katika dunia ya leo; kwani mbali na athari zao za moja kwa moja kwa watu, pia vinaathiri utamaduni, mila, vigezo na viashiria ambavyo hadhira hujenga juu yake misingi ya tabia na mienendo yake.
Ulimwengu wa vyombo vya habari wa Hollywood pia tangu mwaka 1990, kwa mabadiliko ya taratibu lakini yanayoonekana, umeelekeza mwelekeo mkuu wa kazi zake katika mada za uokozi na mwisho wa dunia.
Wanawake, waliosalia pekee wa ubinadamu duniani
Watayarishaji wa sinema ya Hollywood, katika kuonesha matukio ya mwisho wa dunia, wametumia aina mbalimbali za majanga na matukio, na kila siku huongeza mada mpya katika simulizi hizo.
Matukio kama mafuriko, matetemeko ya ardhi, baridi kali, matatizo ya upumuaji, mionzi ya jua, teknolojia na akili bandia, mabomu ya nyuklia, migogoro ya kifedha, viumbe wa angani, kutokuweza kuzaa kwa binadamu na mambo mengine mengi, ni miongoni mwa sababu zinazotumiwa katika filamu za Hollywood kuonesha kuangamia kwa dunia.
Hata hivyo, miongoni mwa haya, pia kuna mada nyingine za ajabu zilizotumiwa na Hollywood katika kuunda simulizi za mwisho wa dunia. Katika tamthilia "The Last Man", tunaona kwamba wanaume wote duniani – isipokuwa mtu mmoja – wanakufa kwa ugonjwa wa ajabu, na wanawake wanabaki kuwa waliosalia pekee duniani, wakikabiliwa na changamoto za kijamii na kisiasa zinazotokana na kutokuwepo kwa wanaume.
Ingawa kwa dhahiri filamu na tamthilia hizi hutengenezwa kwa lengo la kuwaburudisha watazamaji, haifai kupuuzwa fikra na itikadi zilizojificha nyuma ya pazia la uzalishaji wa kazi hizi.
Kuegemea mafanikio ya binadamu; suluhisho la kunusurika na majanga ya mwisho wa dunia
Mwelekeo maalumu wa sinema ya Hollywood katika kuunda aina mbalimbali za simulizi za mwisho wa dunia na kuonesha Mwokozi asiye wa kiungu ni ukweli usiopingika unaoonekana katika kazi nyingi za tasnia hiyo.
Tamthilia "Fallout", ambayo ni kazi ya baada ya mwisho wa dunia ya mwaka 2024, inasimulia maisha ya wanadamu baada ya kuangamia kwa dunia kutokana na mabomu ya nyuklia.
Katika tamthilia hii, mbali na kukosekana kabisa kwa dalili za masuala ya kidini na kiimani, kuna tukio linaloonesha wazi kuwa suluhisho la kunusurika na majanga ya mwisho wa dunia na kuishi katika jamii bora na ya kiideal, ni kuegemea mafanikio ya binadamu na si kwa Mwenyezi Mungu.
Mtazamo wa kiubinadamu wa sinema ya Magharibi kuhusu Mwokozi
Filamu ya "Snowpiercer" ya mwaka 2013, inasimulia hadithi ya kundi la wanadamu waliosalia duniani baada ya kuangamia kwake kutokana na matukio ya mwisho wa dunia, ambao wanaishi ndani ya treni inayosafiri bila kusimama. Sifa kuu ya treni hiyo ni mgawanyiko mkubwa wa kitabaka uliopo ndani yake, ambao unasababisha uasi wa watu wa tabaka la chini dhidi ya tabaka la juu, chini ya uongozi wa mtu anayeitwa Curtis.
Mhusika huyu, licha ya kuwa na historia yenye giza, anaoneshwa kama Mwokozi wa watu wa tabaka la chini, lakini kwa maamuzi yake mabaya husababisha tukio linaloangamiza treni nzima, na watu wawili tu ndio wanaobaki hai.
Katika filamu hii, hakuna dalili yoyote ya Mwokozi wa kiungu; na wanadamu, kwa kumwamini mtu wa kawaida asiye wa kiungu, husababisha maangamizi ya treni. Kwa hakika, filamu hii inaonesha aina fulani ya ukosoaji wa fikra ya uokozi na kumwamini Mwokozi, ambao unatokana kabisa na mtazamo wa kiubinadamu wa sinema ya Magharibi kuhusu Mwokozi; ilhali kumwamini Mwokozi wa kiungu aliyeunganishwa na wahyi kunaweza kuandaa maisha bora kwa ubinadamu wote.
Familia ya Kimarekani, Mwokozi wa dunia
Filamu ya uhuishaji "The Mitchells vs. The Machines" inasimulia hadithi ya familia ya “Mitchell” ambayo katikati ya safari ya barabarani hukumbana ghafla na uasi wa roboti na akili bandia. Filamu hii, kwa lugha ya ucheshi, inazungumzia vitisho vya mwisho wa dunia vinavyotokana na teknolojia, na inaonesha jinsi utegemezi wa binadamu kwa akili bandia unavyoweza kusababisha janga. Hata hivyo, ndani ya machafuko hayo, kuna ujumbe uliofichwa: “Familia ndiyo mwokozi wa kweli pekee!”
Familia ya Mitchell ni familia ya Kimarekani inayosafiri kwa gari la Kimarekani aina ya Ford, ambayo licha ya tofauti zao, inaonesha kwamba upendo na mshikamano wa kifamilia vinaweza kushinda hata vitisho vikubwa zaidi vya mwisho wa dunia, na kuwafanya wao kuwa waokozi wa dunia. Ingawa katika filamu hii umuhimu wa familia na mshikamano wao umeoneshwa kwa namna nzuri, lakini kulingana na mtindo wa kawaida wa sinema za mwisho wa dunia za Hollywood, hakuna dalili ya Mwokozi wa kiungu na wa mbinguni, na waokozi wote ni wanadamu wa kisekula.
Sifa za jamii za baada ya mwisho wa dunia katika filamu za Hollywood (1)
Sinema ya Hollywood, katika kazi zake nyingi, inapochora taswira ya kipindi cha mwisho wa dunia na baada ya mwisho wa dunia wa ubinadamu, huonesha jamii zenye sifa hasi na mustakabali mweusi.
Kurudi kwa binadamu katika maisha ya kikatili ya kikabila na kifamilia ni miongoni mwa sifa za jamii za baada ya mwisho wa dunia katika filamu za Hollywood. Katika baadhi ya kazi za aina hii, tunaona wanadamu waliosalia duniani wakirejea maisha ya kikabila, wakiwa na mila, desturi na sheria zao za kipekee, na wakijitahidi kukata mawasiliano na wengine.
Tamthilia "SEE" ni mfano dhahiri wa kuonesha maisha ya kikabila katika kipindi cha baada ya mwisho wa dunia cha Hollywood, ambapo watu wanaoneshwa wakiishi katika makabila mbalimbali miaka mingi baada ya karne ya 21, na daima wakipigana kwa ajili ya kuendelea kuishi dhidi ya makabila mengine.
Sifa za jamii za baada ya mwisho wa dunia katika filamu za Hollywood (2)
Sinema ya Hollywood, katika kazi zake nyingi kuhusu mwisho wa dunia na baada ya mwisho wa dunia, huonesha mustakabali mweusi. Kuwepo kwa mfumo wa kitabaka na tofauti kubwa za kitabaka ni miongoni mwa sifa za jamii za baada ya mwisho wa dunia katika filamu za Hollywood. Kwa mfano, katika tamthilia "Silo", tunaona jamii inayolazimika kuishi katika maghala ya chini ya ardhi kwa sababu uso wa dunia haukaliki tena.
Hata hivyo, ndani ya maghala hayo kuna tofauti kubwa za kitabaka; kiasi kwamba katika tabaka za juu, zenye mazingira bora zaidi, wanaishi watu wenye nafasi za uongozi, na kadiri tunavyoshuka chini, tunaona watu maskini na wafanyakazi wanaoishi huko, wakilazimika kufanya kazi ngumu na kuvumilia mazingira magumu. Maudhui haya pia yanaonekana wazi katika kazi nyingine za Hollywood kama "Snowpiercer", ambapo watu huishi katika mabehewa tofauti ya treni kulingana na tabaka zao.
Sifa za jamii za baada ya mwisho wa dunia katika filamu za Hollywood (3)
Kuishi pamoja na wasiwasi na hofu ya matukio na hatari za jamii ya kutisha ya baada ya mwisho wa dunia ni jambo linaloonekana katika karibu filamu zote za aina hii za Hollywood. Hatari zilizobaki baada ya majanga ya mwisho wa dunia ni miongoni mwa mambo yanayowatia hofu wanadamu katika jamii hizi, na huishi chini ya kivuli cha woga huo.
Filamu ya "Finch" ni mfano wa hali hii, inayosimulia maisha ya mwanaume mmoja pamoja na mbwa wake, ambaye anajitahidi kusimama imara dhidi ya hatari na vitisho hivyo na kushinda hofu na wasiwasi wake. Hali hii ni tofauti kabisa na mtazamo wa Uislamu, ambao unaonesha kipindi cha dhahabu na chenye nuru kubwa kwa mustakabali wa ubinadamu baada ya kudhihiri kwa Mwokozi, ambapo jamii zote za wanadamu chini ya utawala wa Imam Mahdi (a.s.) zitaishi kwa amani na utulivu kamili katika nyanja zote za maisha.
Kutoka uokozi wa mtu binafsi kwenda uokozi wa pamoja
Mtazamo wa kisekula wa sinema ya Magharibi kuhusu mwisho wa dunia umesababisha jukumu la kukabiliana na migogoro ya mwisho wa dunia kukabidhiwa kwa wanadamu wa kidunia na kimada; wanadamu ambao hakuna hata mmoja wao anayeweza peke yake kutekeleza jukumu la mwokozi wa mwisho. Kwa msingi huu, sinema imeunda taratibu mtindo wa uokozi wa pamoja; mtindo ambao wakati huohuo hutangaza wazi mipaka yake na Mwokozi wa kiungu.
Katika sinema ya Hollywood kwa miaka mingi, uokozi wa dunia ulikuwa juu ya mabega ya shujaa mmoja; shujaa ambaye alipaswa kusimama dhidi ya giza, ufisadi au janga la kimataifa (kama Neo katika filamu ya "The Matrix"). Lakini katika miongo ya hivi karibuni, mtindo huu umebadilika, na hasa baada ya kuibuka kwa ulimwengu wa sinema wa "Marvel", migogoro ya mwisho wa dunia si ile ambayo mwokozi mmoja anaweza kuikabili peke yake. Badala yake, kundi la mashujaa wenye nguvu na sifa tofauti hukusanyika pamoja ili kuokoa dunia. Katika simulizi hii mpya, uokozi si kazi ya mtu mmoja, bali ni matokeo ya ushirikiano wa pamoja.
Wakati Hollywood inachoshwa na Mwokozi
Sinema ya Hollywood daima imekuwa ikimpenda “Mwokozi”; shujaa anayejitokeza kutoka gizani, anaokoa ubinadamu na kufufua matumaini. Waokozi wamekuwa uti wa mgongo wa sinema ya Magharibi. Lakini katika miaka ya hivi karibuni, mabadiliko madogo lakini muhimu yameonekana katika simulizi hizi, na inaonekana kwamba mtazamo mpya kuhusu Mwokozi unaanza kujitokeza katika sinema ya Hollywood sambamba na mtazamo wa zamani wa kuendeleza fikra ya uokozi.
Hollywood sasa haisimami tu katika kuonesha Mwokozi; bali pia inamkosoa Mwokozi!
Wakati mwingine Mwokozi hushindwa, wakati mwingine hugeuka kuwa tishio kubwa zaidi kuliko adui, na wakati mwingine kabisa hakuna uokozi na dunia huangamia! Kwa mfano, katika filamu kama "Don’t Look Up", "Snowpiercer" na "Dune", ujumbe huu unasikika: “Waokozi si suluhisho kila wakati; wakati mwingine tatizo lenyewe linatokana nao.” Mabadiliko haya ya mtazamo ni kielelezo cha mgogoro mkubwa wa imani na kiroho huko Magharibi; jamii inayotilia shaka dini, serikali, sayansi na hata mashujaa wake haiwezi tena kuwaangalia waokozi kwa macho yale yale ya zamani (Ikumbukwe kuwa mada hii haina uhusiano na Mwokozi wa Kiislamu, bali ni mtazamo wa kukosoa kwa ujumla fikra ya uokozi.)
Na hatimaye, kukosekana kwa umoja katika Hollywood ya leo
Sinema ya Magharibi ambayo hapo awali, kwa kuwatambulisha “waokozi wa kidunia”, ilikuwa ikishindana na wazo la Mwokozi wa mbinguni, sasa imeingia katika awamu ya “kuondoa kabisa fikra ya Mwokozi”. Kuondolewa kwa mashujaa wa kibinadamu katika baadhi ya kazi mpya kunamaanisha kifo cha “matumaini” na kuingiza fikra hatari kwamba binadamu amebaki peke yake mbele ya hofu ya mwisho wa dunia.
Kwa hakika, Hollywood ya leo haina umoja; bali imegawanyika: upande mmoja kuna mkondo wa mashujaa wakuu (superheroes) ambao bado kwa nguvu wanaendeleza fikra ya uokozi wa kidunia ili kukidhi haja ya hadhira kwa shujaa, na upande mwingine kuna mkondo unaomwacha binadamu wa kisasa akiwa mpweke na asiye na msaada kwa kuondoka kabisa Mwokozi.
Utafiti huu unaendelea…
meandaliwa na Kituo Maalumu cha Mahdawiyya cha Hawza ya Eya Qum (Kitengo cha Magharibi na Mahdawiyya) huku ikifanyiwa marekebisho kiasi.
Maoni yako