Kwa mujibu wa ripoti ya idara ya Tarjama ya Shirika la Habari la Hawza, taarifa hiyo ya hivi karibuni ya Hamas ilitolewa sambamba na maadhimisho ya Siku ya Kimataifa ya Mshikamano na Wapalestina, ambayo hufanyika kila mwaka tarehe 29 Novemba, ambapo harakati ya Hamas imewaomba watu duniani kuonesha mshikamano mkubwa zaidi na wananchi madhulumu wa Palestina.
Hamas pia imewaomba watu huru na waadilifu waliopo kila pembe ya dunia kuunga mkono azma ya usawa wa wananchi wa Palestina pamoja na haki zao halali za uhuru na kujitegemea.
Harakati hiyo vilevile imetoa shukrani kwa wanaharakati wa harakati za wananchi duniani kote kwa juhudi ambazo zimekwishachukuliwa hadi kufikia sasa, na imetoa wito wa kuunganishwa juhudi zote kwa lengo la kuimarisha safu ya mapambano ya Wapalestina dhidi ya uvamizi wa Israeli.
Hamas imewaomba Waarabu, Waislamu na watu wote huru duniani kuifanya tarehe 29 Novemba, kwa mnasaba wa Siku ya Mshikamano na Palestina, kuwa mwanzo mpya wa kuamsha ari na msisimko mpya wa kuwaunga mkono wananchi madhulumu wa Palestina dhidi ya uvamizi wa Israeli na ukiukwaji wa sheria za kibinadamu katika Ukanda wa Ghaza, Ukingo wa Magharibi na Yerusalemu.
Hamas ilitangaza kuwa: Siku ya Kimataifa ya Mshikamano na Wananchi wa Palestina katika mwaka huu inakuja karibu siku 50 baada ya kuanza kwa makubaliano ya kusitisha mapigano katika Ukanda wa Ghaza, ambapo katika kipindi hicho serikali ya kikoloni ya dhalimu ya Israeli imeendelea kila siku kuvunja makubaliano ya kusitisha mapigano kwa kubomoa majengo, kushambulia wananchi kwa mizinga, na kuzuia kuingizwa misaada ya kibinadamu kwa kuwapiga risasi wanaoijaribu kuipeleka.
Hamas iliongeza kusema: Serikali hii ya kibaguzi ya mrengo wa kulia wa kupindukia inaendelea pia kuzidisha mashambulizi yake, mipango ya ujenzi wa makazi ya walowezi na Uyahudi wake katika Ukingo wa Magharibi na Yerusalemu inayokaliwa kimabavu, bila kujali sheria na maazimio ya kimataifa, hali ambayo inaendelea bila kuwepo vizuizi vyovyote madhubuti vya kuzuia ugaidi, jeuri, uchokozi na njama zake za kihalifu.
Azma ya haki na halali ya watu wetu ni mapambano matukufu ya kitaifa kwa ajili ya kukomesha uvamizi mrefu zaidi na wa kikatili zaidi duniani, ambao athari za uhalifu wake wa kinyama zimevuka na zitaendelea kuvuka mipaka ya ardhi zetu zinazokaliwa. Uhalifu huu na kutokuwapo kwa hatua madhubuti za kuuzuia kutoka kwa nguvu za dunia kumepelekea kudharauliwa kwa maazimio ya kimataifa na ya Umoja wa Mataifa, jambo ambalo ni tishio la kweli kwa usalama na utulivu wa eneo zima na dunia kwa ujumla. Madhara ya hali hii iwapo hakutakuwa na vizuizi madhubuti yatawakumba watu wote duniani.
Chanzo: the Palestinian Information Center
Maoni yako