Kwa mujibu wa Shirika la Habari la Hawza, Hujjatul-Islam wal-Muslimin Muhseni Ejei, Mkuu wa Mahakama ya Jamhuri ya Kiislamu ya Iran, amekutana na kufanya mazungumzo na Ayatullah Sayyid Mujtaba Husseini Khamenei, Kiongozi Mkuu wa Mapinduzi ya Kiislamu.
Katika kikao hicho, imesisitizwa kuongeza mtaji wa kijamii wa mfumo wa Jamhuri ya Kiislamu kupitia kupanua wigo wa uadilifu, kuhakikisha haki za umma zinalindwa, na kupambana kwa ufanisi na ufisadi pamoja na maeneo yanayochochea ufisadi huo.
Vilevile, msisitizo uliwekwa katika kushughulikia kesi kwa haraka, kwa umakini na kwa msimamo thabiti; kutekeleza hukumu kwa wakati unaofaa na kwa namna inayozuia kurudiwa makosa; kuleta mageuzi ya kina na yanayoonekana katika mfumo wa mahakama; na kutumia teknolojia za kisasa kwa kiwango cha juu kabisa katika masuala muhimu.
Masuala hayo muhimu yanajumuisha, hasa, kusimamia utekelezaji sahihi wa sheria, kufanya ukaguzi wa mara kwa mara unaosaidia katika usimamizi wa mashirika na taasisi, kushughulikia uzembe au kushindwa kutekeleza majukumu kunakoishia katika kutendeka uhalifu, pamoja na kuweka juhudi na mipango ya kupambana kwa uthabiti na uhalifu na kuondoa mazingira yanayochochea ukiukaji wa sheria kwa kushirikiana na vyombo vinavyohusika.
Aidha, msisitizo maalumu uliwekwa katika kudai na kurejesha haki pamoja na fidia ya madhara ya kimada na kimaana yaliyotokana na uhalifu uliofanywa na wahalifu wa Marekani na Uzayuni.
Mwanzoni mwa mkutano huo, Hujjatul-Islam wal-Muslimin Mohseni Ejei aliwasilisha ripoti kuhusu mipango ya kipindi kipya cha Mahakama ya Jamhuri ya Kiislamu ya Iran. Miongoni mwa mipango hiyo ni kusasisha hati ya mageuzi ya mfumo wa mahakama na kuharakisha mchakato wa kutumia mifumo mahiri katika shughuli zake.
Hatua hizo zinalenga kuokoa muda katika kushughulikia kesi, kupunguza gharama, kuhakikisha hukumu zinakuwa sahihi na imara, na kuboresha uadilifu pamoja na mwenendo mwema wa wafanyakazi wa Mahakama ya Jamhuri ya Kiislamu ya Iran.
Maoni yako