Kwa mujibu wa Idara ya tarjama ya Shirika la Habari la Hawza, Sophie Binet, Katibu Mkuu wa Muungano Mkuu wa Wafanyakazi wa Ufaransa (CGT), ameonya kuhusu vikwazo vinavyowekwa dhidi ya uhuru wa kuandamana na athari zake kwa demokrasia, huku akitoa wito wa kuhamasishwa kwa wingi wafanyakazi mnamo Novemba 5. Mahitaji ya kuongeza mishahara na kukabiliana na kupanda gharama za maisha ndiyo msingi mkuu wa wito huo.
Sophie Binet alisema: “Kinachohitajika ni kujibiwa mara moja kwa madai yetu; endapo hilo litafanyika, hakutakuwa na mkusanyiko wowote wa maandamano mwishoni mwa wiki.”
Sophie Binet, Katibu Mkuu wa Muungano Mkuu wa Wafanyakazi wa Ufaransa (CGT), siku ya Ijumaa alilaani vikwazo vilivyowekwa dhidi ya haki ya kufanya mikusanyiko ya maandamano, akivielezea kuwa ni hatari kwa demokrasia. Aidha, kutokana na mgogoro wa kupungua uwezo wa wananchi wa kununua bidhaa na huduma, pamoja na waajiri kupinga ongezeko la mishahara, aliwataka wafanyakazi kuhamasika na kushiriki kwa wingi katika shughuli za Novemba 5 ijayo.
Kiongozi huyo wa chama cha wafanyakazi, ambaye alishiriki katika kipindi cha asubuhi cha kituo cha habari cha Franceinfo siku ya Ijumaa, alieleza wasiwasi wake kuhusu kuongezeka marufuku ya kufanya mikusanyiko katika miji kadhaa ya Ufaransa. Marufuku hizo ziliwekwa kufuatia matukio ya vurugu yaliyotokea mwishoni mwa wiki iliyopita.
Alisisitiza: “Uhuru wa kufanya mikusanyiko ya maandamano ndio msingi wa demokrasia; jambo hili ndilo linaloleta tofauti kati ya demokrasia na udikteta.”
Kwa maoni ya Sophie Binet, serikali inaweza kumaliza uhamasishaji wa maandamano kwa kujibu madai ya kijamii yanayotolewa na wananchi.
Akizungumzia suala hilo, alisema: “Ikiwa serikali inataka kufuta maandamano yaliyopangwa kufanyika wiki hii, suluhisho liko mikononi mwake. Kinachohitajika ni kujibu mara moja madai yetu; endapo hilo litafanyika, hakutakuwa na mkusanyiko wowote wa maandamano mwishoni mwa wiki hii.”
Vikwazo dhidi ya mikusanyiko: Tahadhari kuhusu uhuru wa umma nchini Ufaransa
Sophie Binet, huku akikiri uzito wa matukio ya vurugu yaliyotokea katika maandamano yaliyopita, alikosoa sera za serikali na namna inavyosimamia suala la kudumisha utulivu na usalama wa umma.
Kwa mujibu wake, mvutano unaoshuhudiwa kwa sasa umetokana na hasira za kijamii zilizokusanyika kwa miaka mingi. Hasira hizo, zimesababishwa na “miaka kumi ya ukatili wa serikali ya Macron, kulazimisha maamuzi bila mazungumzo, pamoja na kuwadharau na kuwapuuza wafanyakazi wa kike na wa kiume.”
Aidha, alikosoa marufuku ya kufanya mikusanyiko ya maandamano, hususan katika baadhi ya miji ambako njia za maandamano zilikuwa zimetangazwa mapema. Binet pia alipinga mtazamo kwamba mashirika ya vyama vya wafanyakazi ndiyo taasisi pekee zinazoweza kuhakikisha usalama wa mikusanyiko ya maandamano.
Akisisitiza kwamba “mashirika ya vyama vya wafanyakazi hayawezi kuhodhi haki ya kufanya mikusanyiko ya maandamano,” alikumbusha: “Vyama vya kiraia, vyama vya kisiasa, pamoja na raia wa kike na wa kiume, nao wana haki ya kufanya mikusanyiko ya maandamano.”
Kwa maoni ya Katibu Mkuu wa CGT, uhuru wa kufanya mikusanyiko ya maandamano haupaswi kutegemea mtu kuwa mwanachama wa chama cha wafanyakazi au shirika la kisiasa. Anaamini kwamba vikwazo vilivyowekwa kwa sasa vinaweza kuanzisha utaratibu unaotia wasiwasi kuhusu mustakabali wa uhuru wa umma.
CGT Yatoa Wito wa Kupanua Mgomo wa Novemba 5
Mbali na kutetea haki ya kufanya mikusanyiko ya maandamano, Sophie Binet anataka kuanzisha wimbi jipya la uhamasishaji wa kijamii. Muungano wa CGT umewataka wafanyakazi kukutana katika maeneo yao ya kazi, kujadiliana kuhusu madai yao na kufanya uamuzi wa pamoja kuhusu uwezekano wa kugoma mnamo Novemba 5.
Alipoulizwa kuhusu uwezekano wa kufanyika mgomo wa jumla, alieleza mkakati wa muungano huo kwa kusema: “Tunataka mgomo upanuliwe, tunapaswa kutumia istilahi kwa usahihi; mambo haya mawili hayana maana inayofanana kabisa.”
Binet alifafanua kwamba, uhamasishaji huo unapaswa kuanzia moja kwa moja katika maeneo ya kazi, kupitia mikutano ya wafanyakazi wote. Kama mfano, aliwataja wafanyakazi wa ghala la silaha la Toulon, ambao wameamua kugoma ili kupata haki ya mshahara wa mwezi wa kumi na tatu. Pia alikosoa uamuzi wa kuendelea kuiacha bila mabadiliko faharasa ya msingi ya mishahara ya wafanyakazi wa serikali, sera ambayo pia inawaathiri wafanyakazi wa serikali wanaofanya kazi katika sekta ya ulinzi.
Lengo ni kuhakikisha kwamba, kupitia kupanuka kwa maandamano na migomo, wafanyakazi wanapata matokeo yanayoonekana katika masuala ya mishahara na mazingira ya kazi.
Ufaransa Sasa ni Nchi yenye Mishahara Midogo
Suala la uwezo wa wananchi wa kununua bidhaa na huduma limekuwa kiini cha matamshi ya Sophie Binet. Katika hali ambayo Patrick Martin, Rais wa Chama cha Waajiri na Makampuni ya Ufaransa (Medef), amepinga ongezeko la kima cha chini cha mshahara kinachowekwa kisheria (SMIC), akidai kwamba hatua hiyo inaweza kuyaweka makampuni katika hali ngumu, kiongozi wa CGT anaona msimamo huo haukubaliki. Kwa sauti ya kukosoa, alisema: “Ni lazima kukomesha dharau dhidi ya wafanyakazi wa kike na wa kiume.”
Binet ametetea ongezeko la mishahara akieleza kwamba ni njia ya kutambua haki thamani ya kazi, alisema: “Kuongeza mishahara maana yake ni kuitambua kazi yetu; ni kazi yetu inayozalisha utajiri.”
Kwa mujibu wake, mishahara bado haijarejea katika kiwango cha mwaka 2020, huku gharama za kodi za nyumba, mafuta na vyakula zikiendelea kuweka shinikizo kubwa kwa familia.
Alisisitiza: “Kwa kuzingatia kupanda bei kwa kiwango kikubwa, siku hizi haiwezekani kuishi kwa kutegemea kima cha chini cha mshahara.” Kwa sababu hiyo, CGT inaunga mkono ongezeko la asilimia 10 la kima cha chini cha mshahara kinachowekwa kisheria, kurekebisha mishahara kulingana na mabadiliko ya bei, pamoja na kuweka udhibiti wa bei za baadhi ya bidhaa muhimu, hususan mafuta na vyakula.
Sophie Binet pia ameunga mkono pendekezo la kuongeza kima cha chini cha mshahara lililotolewa na Muungano wa Kidemokrasia wa Wafanyakazi wa Ufaransa (CFDT). Hata hivyo, anaamini kwamba makampuni makubwa yana uwezo wa kutosha wa kifedha wa kuboresha mishahara ya wafanyakazi wao.
Misaada ya Serikali kwa Makampuni Yafuatiliwa kwa Karibu na CGT
Katibu Mkuu wa CGT pia amekataa hoja za waajiri kwamba makampuni hayana uwezo wa kuongeza mishahara. Amekosoa misaada inayotolewa na serikali kwa makampuni bila kuyawekea masharti ya kutekeleza wajibu maalumu, huku akitaka sera za serikali zibadilishwe.
Binet alisema: “Kila mwaka, msaada wenye thamani ya euro bilioni 211 hutolewa kwa makampuni bila masharti yoyote wala wajibu wa upande wa pili, na sehemu kubwa ya fedha hizo hunufaisha makampuni makubwa zaidi.”
Kwa maoni yake, misaada hiyo inapaswa kuelekezwa kwa makampuni ambayo kwa kweli yanahitaji msaada, na utoaji wake uwekewe masharti ya kutekeleza wajibu maalumu, hususan katika masuala ya ajira na mishahara.
Katika muktadha huo, aliitaja sekta ya usambazaji na biashara ya jumla na rejareja. Anaamini kwamba makampuni makubwa katika sekta hiyo hayapaswi kunufaika na misaada ya kifedha ya umma bila kukubali kutekeleza wajibu unaolingana na msaada huo.
Hatimaye, kiongozi huyo wa chama cha wafanyakazi ameitaka serikali na waajiri kuchukua hatua haraka iwezekanavyo kukabiliana na kupungua uwezo wa wananchi wa kununua bidhaa na huduma.
Kwa mtazamo wake, kukabiliana na mgogoro wa kijamii kunahitaji hatua za haraka za kiuchumi, na wakati huohuo kunahitaji kuheshimiwa uhuru wa kidemokrasia.
Kadiri Novemba 5 inavyokaribia, CGT inalenga kuweka masuala ya mishahara, ajira na haki ya kufanya mikusanyiko ya maandamano katikati ya uhamasishaji wa kijamii, kupitia ushiriki mkubwa wa wafanyakazi, muungano huo unakusudia kuongeza shinikizo ili madai yake yatimizwe.
Maoni yako