Mwamko wa Umma wa Kiislamu Utaendelea Kupitia Kufuata Maadili ya Imam Khamenei na Umoja wa Kiislamu

Kwa mujibu wa Idara ya Kimataifa ya Shirika la Habari la Hawza, Sayyid Bahauddin Naqshbandi, kiongozi wa Tariqa ya Naqshbandiyya katika eneo la Kurdistan, aliyasema hayo katika kikao cha sita cha kimataifa cha “Mwamko wa Umma wa Muhammad (s.a.w.w.)”, kilichofanyika Jumatano, tarehe 29 Mehr 1405 Hijria ya Shamsi, kwa juhudi za Jumuiya ya Kimataifa ya Qadimun.

Akirejelea hotuba na maelekezo ya Imam Shahidi Ayatullah Sayyid Ali Khamenei, Naqshbandi alisisitiza umuhimu wa kupinga nguvu za kibeberu, kuimarisha umoja wa Umma wa Kiislamu na kuwatetea watu wanaodhulumiwa.

Naqshbandi, akizungumzia msimamo thabiti na muqawama wa wananchi wa Iran dhidi ya nguvu za kibeberu na kikoloni, alisema kuwa harakati hiyo ni kufufua upya ahadi ya kushikamana na malengo ya msingi ya Mtume Mtukufu (s.a.w.w.), yakiwemo kuwaokoa wanyonge, kufanikisha haki ya kijamii na kuimarisha umoja wa Umma wa Kiislamu.

Akisisitiza umuhimu wa kurejea katika mafundisho ya Mtume wa Uislamu (s.a.w.w.), alieleza kuwa ili Umma wa Kiislamu uweze kutekeleza jukumu lake la kihistoria, ni lazima ukabiliane na mifarakano na tofauti zinazousambaratisha, na upige hatua katika njia ya umoja, haki na uwajibikaji wa kijamii.

Kiongozi huyo wa Tariqa ya Naqshbandiyya katika eneo la Kurdistan aliutaja Umma ulioamka na kuitikia wito wa Mwenyezi Mungu kuwa ni Umma wenye uelewa na uwajibikaji, ambao haukai kimya mbele ya dhuluma na ukosefu wa haki, bali hujitahidi kutetea haki za wanaodhulumiwa na kufanikisha malengo ya Kiislamu.

Naqshbandi pia, akizungumzia suala la Palestina na hatua zinazochukuliwa na utawala wa Kizayuni, alisisitiza kuwa suala hilo linahusu ulimwengu mzima wa Kiislamu. Alieleza kuwa Waislamu wanapaswa kuweka kando tofauti zao na kuungana katika kuwatetea wanyonge na kulinda tunu za Kiislamu.

Akirejelea maelekezo ya Imam Shahidi Ayatullah Sayyid Ali Khamenei kuhusu wajibu wa wananchi wa Iran wanapokabiliana na vitisho, alisisitiza umuhimu wa kuwa macho, kujiandaa na kusimama imara katika kuitetea dini na tunu za Mwenyezi Mungu.

Mwisho, Naqshbandi aliashiria umoja wa Umma wa Kiislamu, kusimama kidete dhidi ya dhuluma na kutetea malengo ya Palestina kuwa ni miongoni mwa vielelezo muhimu vya mwamko wa Umma wa Muhammad (s.a.w.w.). Alisisitiza umuhimu wa Waislamu kushikamana na ujumbe wa Mtume Mtukufu (s.a.w.w.) na kutambua wajibu wao wa kihistoria katika kukabiliana na mabadiliko yanayotokea katika ulimwengu wa Kiislamu.